Efrîn...Zindanên veşartî bi serpereştiya Tirkiyê

NavendaNûçeyan-Efrîn: Ji despêka êrîşa Tirkiyê û çekdarên Îtîlafa sûrî li ser Bajarê Efrînê ve, tirkan hercar serefserên azad bi dûr xistin û bêtir pişta xwe dan diz û tundrewan da ku hem nav û nîşana şoreşa Sûriyê û opozîsyonê xirab bikin, hem jî ji bo xurtkirina nijadperestiyê û dijatiya kurdan û wan ji şerê li dijî rejîmê bi rêya rêkeftinên herêmî-navdewletî dûr bixîne, bi ser de jî desthilata wan çekdarên diz di zordariya ne mirovane li dijî kurdan firehtir kir û pişteke abûrî dane wan ji bo avakirina navendên lêpirsîn û zindanên veşartî, ew yek tev de jî bi serpereştiya Mîta Tirkiyê bi xwe birêve diçe.
Beriya niha di 07.12.2020an de me hin navendên girtinê yên di bin destê polîsê leşkerî de li navenda bajêr li gundê Maratê û navçeya Reco eşkere kiribûn, lê îro em ê behsa girtîgehên veşartî bikin, ku tenê di bin kontrola hêzên çekdar de ne û ti serweriya yasayên herêmî û dadwerîyê li wan deran nînin, lê ji ber sedemên ewlehiyê em dê tenê behsa hin girtîgehên din nakin.

01 _ Zindana Veguhestinê-Efrîn(cihê wezareta veguhestinê ya rêveberiya berê) : Çekdarên Cebhe Şamiyê bi fermandariya çekdarên ewlehiya Rejîma Sûriyê birêve dibin. Di vê zindanê de girtî bi awayekî hovane têne eşkencekirin û piştre ji bo zindana Sico li Ezazê (berê guvaşgehek bû)têne veguhestin.

02 _ Zindana Beradê-Efrîn: Ew berê weke Beradeke mezin bû, lê niha kirine zindan û ew jî di bin destê Cebhe Şamiyê de ye û girtiyên navenda bajêr têde dimînin,bi taybetî girtiyên jin, li wir jî girtî rastî eşkenceyeke canî û derûnî ya hovane tên.

03 _ Zindana Dibistana Keramê-Efrîn: Ev dibistan ji kevintrîn dibistanê Efrînê tê naskirin, ew jî di bin destê Feyleq El-Şam de ye û têde beşekî taybet bi girtiyên jin heye, ku girtî bi giştî têde têne eşkencekirin.

04 _ Zindana Mehkemê-Efrîn:Li heman mehkema berê ye( jê re digotin Serê) û taybet e bi girtiyên jin û di bin destê çekdarên Cebhe Şamiyê û Mîta Tirkiyê de ye, girtiyên jin ji her devereke Efrînê têde hene.

05 _ Zindana gundê Tirundê-Efrîn: Di bi destê Mîta Tirkiyê de ye û ji zindanên veşartî yên herî xirab tê zanîn, li wir jî girtî têne eşkencekirin.

06 _ Zindana Dibistana Ezhar Efrîn (Kulîlkên Efrînê) a taybet-Efrîn: Çekdarên Ehrar El-Şerqiyê birêve dibin û Mîta Tirkiyê jî serpereştiyê dike, piraniya girtiyan ji xelkê bajêr û gundên Efrînê ne.

07 _ Zindana Dibistana El-Îtîhad El-Erebî-Efrîn: Çekdarên Cebhe Şamiyê birêve dibin û têde beşekî taybet bi girtiyên jin heye, piştre ev zindan bû navendeke leşkerî.

08 _ Zindana Taxa Eşrefiyê-Efrîn: Ew bi xwe maleke kevin e û kes têde nebû, çekdarine diz bi fermandariya yê bi navê Ebû Idrîs birêve dibe, di vê malê de anjî zindanê de 4 ode hene, ku 2 ji wan ji bo girtiyan e û hejmara wan digihe 50-60 kesî jî.

09 _ Zindana Taxa Mehmûdiyê-Efrîn: Çekdarên Hemzat vê zindanê birêve dibin û têde bi dehan girtî hene,û têde 2 ode taybet bi girtiyê jin hene.

10 _ Zindana Taxa Vêlata-Efrîn: Ew bi xwe maleke kes lê nebû û çekdarên Ehrar Şerqiyê wê birêve dibin.

11 _ Zindana Dibistana Emîr Xubarî-Efrîn: Mîta Tirkiyê bi hevkariya çend fermandarên girûpên çekdar birêve dibe, têde lêpirsîn bi yên berê bi rêveberiya berê re kar kiribûn tê kirin.

12 _ Zindana Bajarokê Basûtê-Efrîn: Herwiha bi Zindana Kelehê tê naskirin û çekdarên Hemzat wê birêve dibin û piraniya girtiyan ji deverên di bin kontrola girûpa navbûrî ne.

13 _ Zindana gundê Xirêbê Şera-Navçeya Şera(Şikaka): Çekdarên Sultan Murad birêve dibirin, niha jî bûye zindanek di bi destê polîsên leçkerî û sivîl de.

14 _ Zindana gundê Kefercenê( Serê Kaniyê)-Navçeya Şera: Çekdarên Cebhe Şamiyê bi fermandariya Ebû Ehmed Nûr birêve dibin, girtiyên nikarîbin pereyan ji bo serbestberdana xwe bidin, li wir têne kûştin, ji ber 15-20 hezar dolar ji wan dixwazin. Di vê zindanê de girtîne hene bêtirî 2 salan li ser girtina wan derbas bûye,lê rêveberiya zindanê rê nade ew ji bo dadgehê û polîsên leşkerî û sivîl bêne veguhestin, hîn tew li wan girtiyan xwedî dernakevin û red dikin li cem wan bin. Rêveberê rêveberiya zindanê yê bi navê Ebû Brahîm gava kesek anjî parêzerek li girtiyekî bipirse îdîa dike ku mesele di destê Mîta Tirkiyê de ye û kes nikare tiştekî bike.

15 _ Zindana gundê Şingêlê-Navçeya Bililê: Zindan maleke welatiyekî sivîl ê bi navê Cemîl Mihemed Eteş e û çekdarên Hemzat, ku gundên Şingêlê, Zeerê, Elî Karo û Bêkê kontrol dikin, birêve dibin. Zindan bi xwe jî biçûk e, 15 X 5 mitroyan e, berê axirek bû, di vê zindanê de eşkenceyeke hovane bi derheqê girtiyan tê kirin, heman weke rejîmê bi eşkenceya kehrebekirinê, Blanko, Dolab, danîna hesinekî di navbera herdu destên kesê girtî, Bense ji bo hilkirina dirnaqan, şewitandina bi cixaran, kebla 4 xetî, ji ber vê eşkenceya hovane girtî carinan kerr û falince dibin.

16 _ Zindana Meydan Ekbes-Navçeya Reco: Çekdarên Feyleq El-Şam bi serpereştiya Mîta Tirkiyê birêve dibin, nêzîkî sînorê bi Tirkiyê re hatiye avakirin û têra 350-400 girtî dike û ji 10 odeyan pêk tê, ku tenê têra derbasbûna ba valahî heye. Piştî eşkencekirin û lêpirsîna seretayî girtî ji bo Tirkiyê têne veguhestin.

17 _ Zindana Mihetê(Wîstgeh)-Navçeya Reco: Navê wê ji wê yekê tê ku di wîstgeha tirêne de ye û çekdarên Ehrar El-Şerqiyê birêve dibin. Piraniya girtiyan ji xelkê navçeyê ne û bi zindana herî xirap li navçeyê tê naskirin.

18 _ Zindana gundê Kûra-Navçeya Reco: Girtîgeheke biçûk e di maleke nêzîkî gund ye, çekdarên Feyleq El-Şam birêve dibin.

19 _ Zindana Şiyê-Navçeya Şiyê: Bi Zindana Ebû Emşe tê naskirin, ji navê fermandarê girûpa wê deverê kontrol dike hatiye, eşkenceyeke hovane têde tê kirin.

20 _ Zindana gundê Qermitliq-Navçeya Şiyê: Çekdarên Mihemed Casim(Ebû Emşe) fermandarê girûpa Sultan Silêman Şah birêve dibin û di navenda ewlehiyê ya wan de ye. Di vê zêndanê de çend girtî di dema eşkenceyê de bi guleyan hatine kuştin.

Rêxistina Mafên mirovan li Efrînê

09.01.2021

Efrîn…Zindanên veşartî bi serpereştiya Tirkiyê

Çekdarên kêm yên bê exlaq û dûrî mirovahiyê

Çekdar pera li xelkê ferz dikin

Dizê wê bi destê parêzvanê wê ye